Kecha mamlakat milliy chempionatining 18-tur uchrashuvini o‘z maydonida “So‘g‘diyona”ga qarshi o‘tkazgan “Metallurg” jamoasi (3:1) murabbiylar shtabi hamda o‘yinchilariga qisqa muddatli ta’til berildi. Jamoa futbolchilari Mustaqillik bayramini oila davrasida o‘tkazishadi va 6 sentyabrda Bekoboddagi qarorgohlarida to‘planishadi. Bolqonbo‘yilik murabbiylar Vesko Steshevich hamda Nenad Vukchevichlar ham shu kuni Montenegro – Turkiya – O‘zbekiston yo‘nalishi bo‘yicha Toshkentga uchib kelishadi va jamoaning navbatdagi tur o‘yinlariga tayyorgarlik jarayoniga bosh qosh bo‘lishadi.
FIFA kunlari munosabati bilan Superliga taqvimida katta tanaffus yuzaga kelmoqda. O‘zPFLning xomaki rejasiga ko‘ra (loyiha) “Metallurg” sentyabr oyida ikkita o‘yin o‘tkazishi lozim. Dastlabki bahs 22 sentyabr kuni safarda OKMKga qarshi bo‘lib o‘tsa, 28 sentyabr sanasida bekobodliklar Olmaliq shahrida “Andijon”ni qabul qiladi.
