«Arsenal» ortiqcha shov-shuvlarsiz arzon, lekin maqtashga arziydigan transferni amalga oshirdi.
40 mln. yevro (yana 5 mln. bonus) evaziga Mikel Arteta Yevropaning kelajagi porloq himoyachilaridan birini shogirdlari safiga qo‘shib oldi. Afsuski, Yurriyen Timber APLdagi debyutidayoq - «Nottingem Forest»ga qarshi bahs (2:1) 2-bo‘limining boshida jiddiy jarohat olib, uzoq muddatga safdan chiqdi. Lekin, u hali qaytadi...
«Ayaks»ning 22 yoshli himoyachisi Yurriyen Timber «to‘pchilar»ga himoya chizig‘idagi tanlov imkoniyatini kengaytiradi. Niderlandiyalik debyutantdagi universalizm unga Uayt bilan o‘ng qanotda raqobat qilish, zarur pallada Salibaga ko‘maklashish imkoniyatlarini beradi.
«Uning yoshida men Timberning saviyasidan ancha yiroq edim. U yuksak salohiyatga ega bo‘lgan o‘yinchi. Umid qilamanki, u shiddatli rivojlanishni davom ettiradi», - dedi himoyachining terma jamoadagi sherigi Virjil van Deyk.
«Ayaks» uslubi Timberni ruhlantirib yubordi. U to‘pni o‘ta qaltis usulda olib yuradi
«Men himoya markazida, o‘ng qanotda va zarur paytlarda markazda o‘ynay olaman. Tezkorlik xislatini saqlay olsam, mamnun bo‘lardim», - dedi Timber Londonga o‘tganidan keyin.
«Yurriyen to‘p bilan a’lo darajada muomala qiladi. Albatta, himoyachi birinchi navbatda o‘z darvozasi daxlsizligi uchun kurashishi kerak, ammo u har qanday bosim ostida ham xotirjam to‘p suradi. Bu o‘ta ajoyib xususiyat», - dedi o‘z hayratini yashira olmagan Marko van Basten.
Timberning asosiy ustunligi - chiziqlar oralig‘idagi uzatmalari. Uning tez fikrlash qobiliyati «Ayaks»ga bo‘shliqlardan unumli foydalanish va to‘pni jarima maydonchasiga tezroq yetkazish imkonini berardi. «Napoli»ga qarshi bahsda Yurriyenning qarori vaziyatni o‘zgartirib yubordi. U to‘pni osonlikcha qanotga yetkazishi mumkin edi. Biroq raqib bunga tayyor ekanligini ko‘rgach, hujumni o‘yinchilar gavjum bo‘lgan hududdan davom ettirdi. Zambo-Angissa Taylor tomon yurdi, Di Lorenso tor yo‘lakchada qoldi. Buni ko‘rgan Bergveyn to‘pni bo‘sh qolgan Bassiga yo‘lladi va Klassen hujumni gol bilan yakunladi.
Boshqa bir misol - Bergeysdan qaytgan to‘pni Timber to‘xtatmagan holda Taylorga yo‘lladi va jamoa tezkor uzatmalar evaziga golli vaziyatga ega bo‘ldi. Yurriyenning bu fazilatlari «Arsenal»ga qo‘l kelishi aniq. Artetaning ixtiyorida Xaverts, Edegor kabi bo‘shliqdan samarali foydalana oladigan o‘yinchilar bor, Timber bilan jamoa qudrati yanada oshadi.
To‘p bilan oldinga o‘tish - Timberning qudratli quroli
Opta taqdim etgan grafikka ko‘ra, 5 metr va undan uzoqroq masofalarga to‘p bilan o‘tish borasida Timber (487) eng yaqin raqobatchisidan 76 ballga o‘zib ketgan. Boz ustiga, u asosan hujumchilar bilan kuch sinashadi.
Yurriyenning qanotga yoki oldingi chiziqqa intilishi reydlar uchun qulay vaziyatlarni yaratadi. To‘p yo‘qotishlar ko‘p bo‘lmasligi uchun ten Xag va Sxroyder uslubni Timberning harakatlarini hisobga olgan holda belgilashgan.
Birinchi usul - himoya chizig‘ida uchlikni shakllantirish. Yurriyen vaziyat taqozosiga ko‘ra qanotdagi markaziy himoyachiga aylanar va oldinga intiladi. Ortda qolgan ikki nafar sheriklari uning himoyadagi vazifasini o‘z zimmalariga olishadi. «Arsenal» shunga o‘xshash usulni qo‘lladi. Gabriel va Salibalar yoniga Uayt qo‘shildi. Biroq Ben oldinga juda kam o‘tardi.
Ikkinchi usul - Timberning birorta sherigi bilan pozisiya almashishi. U o‘ng qanot himoyachisi yoki tayanch yarim himoyachisi o‘rniga o‘tadi. «Men tez-tez raqib jarima maydonchasida paydo bo‘lardim. Dribling uchun bo‘shliqlar ko‘p bo‘lsada, bir marta fintlarsiz oldinga intildim. Afsuski, gol ura olmadim, lekin o‘ta xavfli vaziyatni yaratdim», - degandi Timber NEKka qarshi o‘yindan keyin.
Mana o‘sha lavha. Yurriyen o‘ng qanotda ochilib, keyin markazga intildi. U yerda Tadich bilan to‘p almashib, darvozaga yo‘lladi. Ya’ni, o‘zi uchun golli vaziyatni yaratdi.
Terma jamoada ham u o‘ng qanotdan reydlar uyushtiradi. Argentinaga qarshi o‘yinda De Yong uni bo‘shliqqa olib chiqdi, bu paytda Gakpo Ensoning yonida edi. Timber bir intilish bilan ikki raqibini ortda qoldirib, to‘pni Kodiga uzatdi. U esa olis shtanga tomon yo‘lladi. Ba’zan sustkashlik va to‘p yo‘qotishlar oqibatida muammolar paydo bo‘ladi. «Nazarimda, to‘pni ko‘proq o‘zimda olib yurdim. Tajovuzkor raqiblar meni izma-iz ta’qib qilishdi. Bunday jamoaga qarshi o‘ynash qiyin», - degandi Yurriyen JCHdagi Ekvadorga qarshi bahsdan keyin.
Artetadan ana shu o‘yin tajribasini mukammal o‘rganish talab etiladi. Faqat o‘yinchilar pozisiyalarini almashtirish bilan maqsadga erishib bo‘lmaydi. Agar Mikel munosib balansni topa olsa, Timber «Arsenal»ning ishonchli quroliga aylanadi.
Timber himoyadagi tajovuzkorlikka ko‘nikib qolgan. Bu uning APLga va «Arsenal» prinsiplariga moslashib olishini tezlatadi
Yakkakurashlardagi tezkorligi va tirishqoqligi tajovuzkor reydlarni amalga oshirishida qo‘l keladi. Muhimi, hujum o‘tish vaqtini u to‘g‘ri belgilaydi va kerakli paytda raqibiga gavdasi bilan to‘siq bo‘ladi. «U katta bo‘shliqda to‘p surgani bois, ixchamlik qoidasiga rioya qiladi. Bu borada Yurriyen ulkan muvaffaqiyatlarga erishmoqda», - degandi Rud Gullit o‘tgan yil sentyabrida.
«Liverpul» va «Napoli»ning hujumkor o‘yinchilari - o‘ta xavfli raqiblar. Qandaydir soniyani e’tiborsiz o‘tkazsang, xatoga yo‘l qo‘yishing aniq. Bu men uchun ulkan saboq - hakam hushtagi chalingunga qadar hushyorlikni yo‘qotmaslikka odatlandim», - degandi Timber. Lekin himoyachi ba’zan jarima maydonchasi ichida xatolarga yo‘l qo‘yadi. Jumladan, raqib uzatmalarini bartaraf etishga kechikadi.
APL vakillari bu kamchilikdan foydalanishga urinishlari aniq. Biroq har holda, Yurriyenning ijobiy xislatlari juda ko‘p. Yakkakurashlarda raqiblarini ishonchli ta’qib etishi Arteta talablariga tez ko‘nikishida yordam beradi.
179 sm. bo‘yli Timber qanday qilib «2, qavat»da ustunlik qiladi?
Baland bo‘yli raqiblariga qarshi kurashda Yurriyen avvaldan pozisiya tanlaydi kurashga tayyor turadi. «Feyenoord»ga qarshi o‘yinda «Ayaks» yuqori pressing usulini qo‘llab, olis uzatmalardan foydalandi. O‘z vaqtida tezlanish olgan Timber Jahonbaxshdan avvalroq sakrab, xavfni bartaraf etdi.
«Yurriyenning himoyada ishonchli o‘ynashiga ishonchim komil emasdi. Axir u baland bo‘yli emasdi. Lekin himoyachi yuqoridan kelgan uzatmalarni ham bemalol qaytarardi», - degandi Rud Gullit.
Asosiy jumboq - Timber o‘zining mahoratini APLda namoyish eta oladimi? Qahramonimiz hozircha faqat Erediviziyeda yorqin to‘p surgani - haqiqat. Angliyadagi faoliyatiga oldindan baho berish qiyin. Lekin Erik ten Xag «MYU»ga ketishi arafasida vatandoshiga yuksak baho bergandi: «Yana bir yetakchi «Ayaks»da tayyorgarlikdan o‘tdi. U samarali to‘p surishdan tashqari, sardorlik vazifasini ham bemalol uddalaydi». Xullas, Saliba va Uaytlar yumushini yengillatishga mo‘ljallangan niderlandiyalik himoyachi qisqa vaqt ichida Artetaning ishonchini qozondi va rasmiy debyutini tarixiy g‘alaba , Angliya Superkubogini qo‘lga kiritish bilan nishonladi. To‘g‘ri, gol yoki samarali uzatmani amalga oshirmadi. Biroq dastlabki bellashuvda murabbiy unga 76 daqiqa to‘p surish imkoniyatini berdi.
S.RAHMONOV tayyorladi
