Saudiya Arabistonining Ar-Riyod shahrida bo‘lib o‘tayotgan og‘ir atletika bo‘yicha jahon chempionatida hozirgina erkaklar o‘rtasida 109 kg. vazn toifasida bahslar yakuniga yetdi.

Unda, kutilganidek, asosiy kurash o‘zbekistonlik ikki sportchi — Akbar Jo‘rayev va Rusan Nurudinov o‘rtasida kechdi.

Akbar dast ko‘tarishda 189 kg. natija bilan oltin medalni qo‘lga kiritdi. U eng yaqin ta’qibchisini naq 8 kiloga ortda qoldirdi. Dast ko‘tarishda Nurudinov 180 kg bilan 4-o‘rinni egalladi (u 3-urinishda 185 kg.ni ko‘tara olmadi).

Siltab ko‘tarishda esa g‘oliblik Ruslan Nurudinovga nasib etdi. Hamyurtimiz 227 kilo shtanga o‘ziga bo‘ysundirdi. Jo‘rayev esa ikkinchi urinishda 226 kg.ni ko‘targach, uchinchi urinishda 331 kg.ni o‘ziga bo‘ysindira olmadi.

Ruslan ikki kurash natijasiga ko‘ra g‘oliblikni qo‘lga kiritish maqsadida 236 kg.ga buyurtma berdi. Ammo unga omad biroz yetishmadi. Oqibatda ikki kurashda chempionlik Akbar Jo‘rayevga niasib etdi — 415 kg. Ruslan Nuriddinov esa 407 kg. natija bilan kumush medalga ega chiqdi.

Qayd etish lozimki, Akbar Jo‘rayev aynan Ruslan Nuriddinovdan so‘ng ikki karra jahon chempioni bo‘lgan ilk og‘ir atletikachi sifatida o‘zbek sporti tarixiga kirdi.

Og‘ir atletika bo‘yicha JCH. Erkaklar, 109 kg.

Dast ko‘tarish
1. Akbar Jo‘rayev (O‘zbekiston) — 189 kg.
2. Xristo Xrostov (Bolgariya) — 181 kg.
3. Dadash Dadashbayli (Ozarboyjon) — 180 kg.
4. Ruslan Nurudinov (O‘zbekiston) — 180 kg.

Siltab ko‘tarish
1. Ruslan Nurudinov (O‘zbekiston) — 227 kg.
2. Akbar Jo‘rayev (O‘zbekiston) — 226 kg.
3. Dadash Dadashbayli (Ozarboyjon) — 223 kg.

Ikki kurash

1. Akbar Jo‘rayev (O‘zbekiston) — 415 kg.
2. Ruslan Nurudinov (O‘zbekiston) — 407 kg.
3. Dadash Dadashbayli (Ozarboyjon) — 403 kg.