"Manchester Yunayted" Ser Aleks Fergyusondan keyin ko‘plab xaridlar qildi. Klub 1.13 milliard funtni 10 yil ichida yangi futbolchilar uchun sarflagan bo‘lsa, shu qiymatning deyarli yarmi, ya’ni 500 million yevrosi eng omadsiz transferlar uchun ketgan. Quyida ularning kimligini bilib olasiz.
10. Radamel Falkao
Kolumbiyalik hujumchi 2014 yilda katta umidlar bilan "Monako"dan olib kelinadi. Garchand ijaraga olingan bo‘lsa ham, Falkao "MYU" uchun naq 6 million funtga tushgandi. U bir mavsum davomida 29 ta bahsda qatnashib, 4 tagina gol urishga muvaffaq bo‘ladi.
9. Morgan Shnederlen
Fransuz yarim himoyachisi bir paytlar APL yulduzi edi. U "Sautgempton"da fantastik darajaga chiqadi. Shu sabab Shnederlenni 2015 yilda "MYU" sotib oladi. Futbolchi uchun 24 million funt sarflanadi. Afsuski, Lui van Gal jamoasida Shnederlen muqim o‘rnasha olmadi. U 2 yarim yil davomida 47 tagina bahsda qantashib, "Everton"ga ketishga majbur bo‘lgan.
8. Memfis Depay
Memfis "Old Trafford"ga katta umidlar bilan olib kelinadi. U "PSV"da porlagandi. Niderlandiyalik hujumchi 2015 yilda 25 million funtga sotib olingan edi. Vinger "MYU" uchun 53 tagina o‘yinda maydonga tushib, 7 ta gol urgan. Depay 2 mavsumdan keyin, "Lion"ga ketadi. U yerdan esa "Barselona"ga yo‘l olgan.
7. Aleksis Sanches
Sanches 2018 yilda olib kelinadi. Uning kelishi uchun Genrix Mxitaryan qurbon qilingandi. 2018 yilning yanvarida "Arsenal" va "MYU" o‘zaro futbolchi almashadi. Afsuski, chililik hujumchi Londondagi darajasiga chiqa olmaydi. Sanches 45 ta bahsda 5 tagina gol urgan. Uning maoshi esa haftasiga 505 ming funt edi. Bir yarim yildan keyin Sanchesni "Inter"ga ijaraga berishadi. Keyinchalik esa u butunlay jamoadan ketadi.
6. Donni van de Bek
Yarim himoyachi "Ayaks"da ko‘rsatgan o‘yinlari uchun sotib olinadi. 2020 yilda "MYU" van de Bek evaziga 35 million funt to‘laydi. Ammo u o‘zidan kutilgan natijalarga erisha olmadi. 3 mavsum ichida 26 yoshli yarim himoyachi 60 tagina bahsda ishtirok etdi xolos. Uning faoliyatiga jarohatlar to‘siq bo‘ldi.
5. Antoni Marsyal
Marsyalni ham katta umidlar bilan xarid qilishgan edi. Ammo hujumchi o‘z darajasini ushlab qola olmadi. Fransuz futbolchisi 2015 yilda 45 million funt evaziga sotib olingan. Marsyal jarohatga moyil bo‘lib chiqdi. 8 yil davomida u "MYU" bilan 301 ta o‘yinda ishtirok etib, 88 ta golga mualliflik qilgan.
4. Anxel Di Mariya
Argentinalik superyulduz 2014 yilda "Real"dan sotib olinadi. O‘sha paytlar u dunyodagi eng yaxshi vingerlardan biri edi. Shunga qaramay, u o‘ziga ketkazilgan 60 million funtni oqlay olmadi. Di Mariya bir mavsum ichida 32 ta bahsda maydonga tushib 4 ta gol urgan. Keyin esa, "PSJ"ga ravona bo‘lgandi.
3. Romeu Lukaku
Lukaku 2017 yilda "Everton"dan rekord summaga xarid qilinadi. 75 million funtlik futbolchidan umidlar katta edi. Belgiyalik hujumchi Mersisaydda zo‘r edi. Ammo "MYU" bilan buni takrorlay olmadi. Afsuski, Lukaku zaxira o‘yinchisiga aylangandi. U umumiy, 96 ta uchrashuvda 42 ta gol urgan.
2. Xarri Maguayr
Angliya terma jamoasi a’zosi "Manchester Yunayted"ga loyiq emasligini ko‘rsatib bo‘lgan. U uchun 2019 yilda 85 million funt sarflanadi. Maguayr to‘rt yildan beri muhim pallalarda yirik xatolarga yo‘l qo‘ydi. Bu davr ichida himoyachi liga kubogini qo‘lga kirita oldi xolos. 2020 yilda u jamoa sardori qilib tayinlangandi. Ammo bu maqom yaqindagina Maguayrdan olib qo‘yildi. Erik ten Xag Maguayrni zaxiraga mixlab qo‘ydi. Uning o‘rnini esa Varan va Martines egalladi.
1. Pol Pogba
"MYU"ning rekord darajadagi xaridi o‘z tarbiyalanuvchisi sanaladi. 2012 yilda "Yuventus"ga ketgach, Pogba katta nomga aylanadi. Uni 2016 yilda 89 million funt evaziga qaytarib olishadi. Keyingi voqealar esa hammaga ma’lum. Pogba 2022 yilda ikkinchi bor "qizil iblislar" safidan erkin agent sifatida ketdi.
ISMATOV J.
