«Manchester Siti»ning raqiblar darvozabonlariga shafqat bilmas norvegiyalik hujumchisi Erling Xoland 2 sentyabr kuni APL 4-turidan o‘rin olgan «Fulxem»ga qarshi o‘yin (5:1)da navbatdagi «xet-trik»ni rasmiylashtirdi.
Endi «yirtqich» hisobida APLda qayd etilgan 5ta «xet-trik» bor. Ammo u bu borada chempionat rekordidan hali ancha uzoqda. Zero, argentinalik Serxio Aguero APL bahslarida naq 12 marta «xet-trik»ka erishgan. Demak, Erling chempionat tarixidagi mutlaq yetakchiga tenglashish uchun yana 7ta o‘yinda 3tadan gol urishi kerak.
1-o‘rin. Ro‘yxat yetakchisi — Serxio Aguero. Argentinalik sobiq hujumchi «Manchester Siti»dagi faoliyati davomida APL o‘yinlarida naq 12ta «xet-trik» to‘plagan.
2-o‘rin. Yana bir sobiq futbolchi Alan Shirer Angliya chempionatidan o‘rin olgan o‘yinlarda 11 marta «xet-trik» qayd etgan. Bu ikkinchi yuqori natija.
3-o‘rin. APLda «xet-trik»lar soni bo‘yicha top-3ning oxirgi vakili - Robbi Fauler. «Liverpul»ning sobiq hujumchisi 9 marta o‘yinni 3tadan gol bilan yakunlagan.
4-6-o‘rinlar. Agar Garri Keyn APLda loaqal yana bir mavsum o‘ynaganida, katta ehtimolki, «xet-trik»chilar xit-paradida kuchli 3talikka bosh suqardi. Fakt shuki, u hozir 8 martadan «xet-trik»ka erishgan Maykl Ouen va Tyerri Anri bilan bir qatorda - 4-6-o‘rinlar.
7-o‘rin. Ueyn Runi Angliya chempionatida 7 marta «xet-trik» rasmiylashtirgan va bu 7-natijadir. Hozircha, albatta. Axir yovqur Xoland tobora yaqinlashmoqda.
8-o‘rin. APLdagi faoliyatini 6ta «xet-trik» bilan yopgan Luis Suaresning pozisiyasi yanada omonat. Hozirda uni amaldagi ikki futbolchi ta’qib qilmoqda - Xoland va Rahim Sterling.
9-15-o‘rinlar. Ha, naq 7 nafar futbolchi hisobida 5tadan «xet-trik» bor. Erling Xoland va Rahim Sterlingda ushbu reyting bo‘yicha yuqorilash imkoniyati bo‘lsa, Ruud van Nistelroy, Endi Koul, Ian Rayt, Robin van Persi hamda Dimitar Berbatov endi pastga tushishsa tushishadiki, tepaga ko‘tarilishmaydi aslo.
D.ALIMOV tayyorladi
