Italiyada o‘z qaddini tiklab olgan yangi «Fiorentina»ning o‘ziga xos  xususiyati - bu muntazam o‘zgarayotgan tarkib...

Diqqat qiling, naq 113ta o‘yindan buyon Florensiya klubining boshlang‘ich tarkibida har safar qandaydir o‘zgarish kuzatilmoqda. Shuncha o‘yin 2 yil muddatni o‘z ichiga olganini hisobga olsak, bu natija yanada hayratlanarli tuyuladi.

45 yoshli Vinchenso Italyano 28 sentyabr kuni «Fiorentina» boshqaruvida 113-o‘yinini nishonladi. Ha, joriy mavsumni chakki boshlamagan Florensiya klubi «Frozinone» maydonida muhim ochkolarni boy berdi - 1:1, lekin Italyano Italiya rekordini yangiladi. Gap shundaki, u ortda qolgan 113ta o‘yinning har birida boshlang‘ich tarkibni o‘zgartirdi. Oddiy aytganda, loaqal 2ta uchrashuvda bir xil tarkibga tayanmadi. Qoyil. Axir 113ta urinishda 113 xil tarkib tanlash... Bunaqasi aqlga sig‘maydi.

Aytish joiz, Germaniyada tug‘ilgan italyan - Vinchencho Italyano ushbu ko‘rsatkich bo‘­yicha «Yuventus» bosh murabbiyi Massimiliano Allegridan o‘zib ketdi. E’tiborli tomoni, «keksa sinyora» ustozi 112ta o‘yinga cho‘zilgan seriyasini yaqindagina uzgandi. Aniqrog‘i, «A» seriya 4-5-turlarida «Lasio» hamda «Sassuolo»ga qarshi kechgan o‘yinlarda bir xil boshlang‘ich tarkibni jang­ga tashladi. Yana bir fakt shuki, Massimiliano bunga qadar Turin klubidagi ikkinchi davrida biror marta ketma-ket 2ta o‘yinda bir xil boshlang‘ich tarkibga tayangan emasdi. Qisqasi, endi Italya­no tarkib «rokirovka»si bo‘yicha mutlaq lider!

P.S.: Italyano «Fiorentina»si «A» seriya 7-tur doirasida «Kalyari»ni, 8-turda esa «Napoli»ni mag‘lub etdi. Jamoa 17 ochko bilan A seriya jadvalida 4-o‘rinni egallab turibdi.