"El-klasiko"da "Barselona" bilan hammasi joyida edi. Hisobdan tashqari Xavi jamoasida ko‘plab ijobiy jihatlarni ko‘rdik. Uning shogirdlari o‘z uyida o‘yinning asosiy qismida ustunlik bilan harakat qildi. Ammo hammasini Jud Bellingemning haddan tashqari yuqori mahorati o‘zgartirdi. Kataloniyaliklar haqli ravishda olti daqiqa ichida ustunlikni o‘z qo‘liga olgandi. Ammo Bellingemning ikkinchi taymdagi gollari uch ochkoni poytaxt jamoasiga olib berdi. "Barselona"ning mag‘lubiyati "Real"dan to‘rt ochko ortda qolishiga sababchi bo‘ldi. Quyida "el-klasiko"da "ko‘k-anorranglilar"ning eng yaxshi va eng yomon futbolchilarini aniqlaymiz.
Eng yaxshi
Gavi: 8/10
Hozir nafaqat Ispaniyada, balki dunyoda ham Bellingemga teng keladiganini topish juda qiyin. Kechagi o‘yin ham buni isbotladi. Ammo mezbonlar safida Bellingem kabi yaxshi harakat qilgan, ammo gol ura olmagan futbolchi bor edi. Gavi o‘sha vakildir. Jamoasi mag‘lub bo‘lganiga qaramay, 18 yoshli yarim himoyachi yorqin harakat qildi. U bahs davomida 10 ta yakkama-yakka kurashlarni yengdi, 9 marta raqibdan to‘pni olib qo‘yib, 4 bor omadli "podkat"ni amalga oshirdi. Shu sabab Gavi 8 ballga loyiq ko‘rildi.
Ilkay Gyundogan: 7/10
Mag‘lubiyatga qaramay, Gavi kabi e’tirofga loyiq futbolchilardan biri bu Gyundogandir. Arauxo Juniorni bir amalladi, Kristensen esa markazda yaxshi harakat qildi. Ammo Gyundogan hammadan ajralib turardi. Sobiq "shaharlik" o‘yin davomida gol urishdan tashqari 94 foiz uzatmalarni aniq ijro etgan.
Eng yomon
Ferran Torres: 5/10
"Barselona" "Real"ni yenga olmaganining asosiy sababi bu hujum chizig‘idagilarning yetarlicha yaxshi harakat qilmagani bilan bog‘liq. Ferran Torresni bu borada ayblasak bo‘ladi. U birorta vaziyat yaratmadi yoki undan foydalana olmadi. 23 yoshli hujumchi bir soat davomida raqib darvozasi tomon birorta zarba bera olmagani fakti ham hammasini aytib turibdi.
Joau Kanselu: 5/10
"Barselona"ning o‘zini ko‘rsata olmagan futbolchilari ichida Kanselu ham bor. Portugaliya terma jamoasi a’zosidan muxlislar ko‘p narsa kutgan edi. Ammo u o‘ziga berilgan vazifani to‘liq ado eta olmadi. Hujumni qo‘llab-quvvatlashda muammolarga duch kelgan Kanseluning o‘zining pozisiyasiga qaytgani ma’qulroq degan fikrlar yangramoqda va bu gapda jon bor.
ISMATOV J.
