Xabaringiz bor, “Navbahor” Osiyo Chempionlar ligasi (OCHL)ning “D” guruhidan o‘rin olgan va ushbu guruhdan “pley-off”  bosqichiga chiqish uchun  “Al-Hilol” (Ar-Riyod, Saudiya Arabistoni), “Nassajiy Mazandaran” (Kaemshahr, Eron) va “Mumbay Siti” (Mumbay, Hindiston) jamoalariga qarshi kurash olib bormoqda.

Sizlarni “lochinlar”ning OCHL guruhidagi raqiblari borasidagi ma’lumotlar bilan  tanishtirishda davom etamiz. Avvalgi maqolalarimizda “Nassaji Mazandaron”ning Eron Pro ligasidagi, “Mumbay Siti”ning Hindiston Superligasi natijalari haqida to‘xtalgandik. Bu safar esa “Al-Hilol” borasida ma’lumot bermoqchimiz.

Ar-Riyodliklar 3 noyabr kuni Saudiya Arabistoni Pro ligasining 12-turidan o‘rin olgan bahsni safarda Al-Hasa shahrining “Al-Fath” jamoasiga qarshi o‘tkazib, 2:0 hisobida g‘alaba qozonishdi.

Gollarga uchrashuvning 5-daqiqasida mezbonlar darvozasiga belgilangan penaltini aniq amalga oshirgan holda, “Al-Hilol”ning serbiyalik hujumchisi Aleksandar Mitrovich hamda bellashuvning asosiy vaqtiga hakam tomonidan qo‘shib berilgan daqiqalar davom etayotgan paytda, ya’ni, 90+3 daqiqada mehmonlarning tajribali yarim himoyachisi Salim Ad-Dosariy mualliflik qilishdi.

Mazkur yutuqdan so‘ng, “Al-Hilol” 12 o‘yindan so‘ng, 10 ta yutuq, 2 ta durang, 32-8 to‘plar nisbatini qayd etgan holda, 32 ochko jamg‘arib, Saudiya Arabistoni Pro ligasidagi peshqadamlik mavqesini mustahkamlab oldi.  

Ikkinchi o‘rinda borayotgan “An-Nasr” hisobida esa 11 ta bahsdan so‘ng, 25 ochko mavjud.

“Navbahor” PFK matbuot xizmati.