«Inter»ning o‘ng qanot himoyachisi Xuan Kuadradoga Braziliya chempionati vakillari qiziqish bildirmoqda.

Kolumbiyalik futbolchi shu yozda «Yuventus»dan erkin agent sifatida «neradzurrilar» safiga ko‘chib o‘tgandi.

Jarohatlari tufayli 35 yoshli faxriy tez-tez maydonga tushmadi va mish-mishlarga ko‘ra, u tez orada klubni tark etishi mumkin.

Jurnalist Ekrem Ko‘nurning so‘zlariga ko‘ra, hozircha nomi oshkor etilmagan Braziliyaning ikki klubi lateral uchun da’vogarlik qilmoqda.

Xuan Kuadrado joriy mavsum «Inter»ning to‘rtta o‘yinida qatnashib, bitta golli uzatmani amalga oshirdi.

Futbolchining shartnomasi 2024 yilning o‘rtalariga qadar mo‘ljallangan va uning transfer qiymati, Transfermarkt ma’lumotlariga ko‘ra, 4 million yevroni tashkil qiladi.