2004 yilning yozi "Liverpul"ni jamoa sifatida eng ko‘p o‘zgartirgan davr bo‘ldi. Rafael Benites yangi murabbiy sifatida olib kelinadi. U beshta futbolchini sotib oladi. Ular ichida yosh va talantli Xabi Alonso ham bor edi. U "Real Sosyedad"da porlaydi. Alonso o‘sha afsonaviy Istanbul finalida muhim o‘rin tutgandi. Keyinchalik ham yarim himoyachi "Liverpul"ni APL chempionligi uchun kurashadigan klubga aylantirishda beqiyos xizmat qiladi. Ha, Xabi Alonsoning eng yorqin davrlari asosan Ispaniyada, "Real" safida kechadi. Shunga qaramay, "Bayer Leverkuzen" ustozining "Liverpul"dagi davri uning keyingi muvaffaqiyatlarida muhim rol o‘ynagan. Xo‘sh, 2004 yili mersisaydliklar Xabi Alonsodan tashqari yana kimlarni sotib olgandi va ularning taqdiri ne kechdi? Bu savolga quyida javob topasiz.
Jibril Sisse
"Liverpul"ning beshta xaridi ichida eng kattasi bu Sisse edi. 22 yoshli hujumchi o‘shanda Fransiyadan katta qahramon sifatida olib kelingan. 2003/04 yilgi mavsumni Sisse 26 ta gol bilan yakunlaydi. Afsuski, futbolchining Angliyadagi davri omadli kechmadi. Dahshatli jarohatlar Sissega o‘ynash imkoniyatini bermasdi. Birinchi mavsum u uchun 16 ta o‘yinda 4 tagina gol bilan yakunlanadi.
Xosemi
Benitesning "Liverpul"dagi ilk xaridi aynan Xosemi edi. U Ispaniyaning "Malaga" klubidan olib kelinadi. Bundan oldin markaziy himoyachi uch mavsum La-ligada fantastik darajaga chiqqandi. Afsuski, u "Liverpul"dagi dastlabki o‘yinida qizil kartochka oladi. Oqibatda, u asosiy tarkibdan tushib qoladi. 2005/06 yilgi mavsum o‘rtasida Xosemi "Vilyarreal"ga yo‘l oladi. Uni YECHL finaligacha bo‘lgan bahslardagi o‘yinlari bilan eslab qolganmiz.
Antonio Nunyes
Nunyes "Real"ning Galaktikos tarkibidan olib kelingan edi. Ha, u ham "Liverpul"ning Istanbul finalida ishtirok etgan. Ammo yarim himoyachi tizzasidagi jarohati sababli yuksala olmaydi. Nunyesning o‘zi bu haqida shunday deydi: "Yangi klubda siz maydonda o‘zingizdan yaxshiroq taassurot qoldirishga harakat qilasiz. Men ham shunday qilishga urindim. Ammo jarohatim bunga yo‘l bermadi. Tizzamdan jarrohlik amaliyoti o‘taganimdan keyin, avvalgidek harakat qila olmay qoldim".
Luis Garsiya
Garsiya Benitesning to‘rtta ispan vatandoshlaridan biri edi. U Xabi Alonso bilan bir kunda sotib olingan. Hujumchi "Liverpul"dagi birinchi mavsumida 13 ta gol urgan. Keyingi ikki mavsum davomida esa 17 ta golga mualliflik qildi. 2007 yilda Garsiya yana "Atletiko"ga qaytib ketadi. Uni biz o‘sha, "Liverpul"ni Istanbul finaliga olib chiqqan "arvoh gol"i bilan eslaymiz.
ISMATOV J.
