"Milan"ning sobiq futbolchisi Kevin-Prins Boateng hujumchilar Rafael Leau va Mario Balotellini solishtirdi.
24 yoshli portugaliyalik hozirgi "Milan"ning asosiy yulduzi sanaladi, biroq ganalik sobiq futbolchining fikricha, Balotelli faoliyatining boshida undan ajoyib o‘yin ko‘rsatdi.
“Leau ajoyib o‘yinchi, lekin Mario shunchaki fenomenal edi, bu boshqa daraja. Men u bilan o‘ynadim va u narsalarga jiddiy qaraganida nima qila olishini ko‘rdim. Har kim ham doimiy ravishda o‘z o‘yinining eng yuqori pog‘onasida qola olmaydi, lekin Balotelli dunyodagi eng yaxshi besh hujumchidan biri edi. U o‘yin sifati bo‘yicha Ibrahimovichga yaqin kelgan yagona odam edi.
Menga Mario juda yoqadi. O‘ylashimcha, u uchta “Oltin to‘p”ni qo‘lga kiritishi mumkin edi, lekin unga har kuni uni turtki beradigan, ya’ni menga o‘xshagan odam kerak edi”, — deya Boateng so‘zlarini keltiradi Football Italia.
