Londonning “Chelsi” klubi yarim himoyachisi Koul Palmer ilk bor Angliya terma jamoasi safida maydonga tushdi.
21 yoshli futbolchi Yevro-2024 saralash bosqichi doirasida Maltaga qarshi o‘yinning 61-daqiqasida Markus Reshford o‘rniga maydonga tushdi. Palmer uchun bu asosiy terma jamoadagi debyut o‘yini. U avvalroq “Uch sherlar” safida 21 yoshgacha, 18 yoshgacha, 17 yoshgacha, 16 yoshgacha va 15 yoshgacha bo‘lgan toifalarda o‘ynagan va ular tarkibida jami 59 ta o‘yin o‘tkazib, 7 marta gol urgan.
Koul Palmer joriy mavsum “Chelsi” safida 14 ta o‘yinda maydonga tushib, 6 ta gol va 4 ta golli uzatmaga mualliflik qilgan. O‘tgan yozda hujumkor yarim himoyachi London klubiga "Manchester Siti"dan ko‘chib o‘tgandi.
