Indoneziyadagi U-17 Jahon chempionati yakunlanib ulgurmasidan, O‘zbekiston U-17 terma jamoasi futbolchilariga Rossiya jamoalaridan qiziqish bo‘layotgani haqida xabar paydo bo‘ldi.
Rossiya chempionati, shubhasiz, yoshlarimizning o‘sishi uchun yaxshi muhit hisoblanadi. Ammo tanganing ikkinchi tomoni bu - Rossiya futbolining hanuz Yevropa futbolidan izolyasiyada qolayotganidir. Rossiya Premyer ligasidan Yevropaning TOP-5 chempionatlariga yo‘l olish vaqt o‘tgan sari murakkablashib bormoqda.
Zaxaryanning "Real Sosyedad"ga, Kuzyayevning "Gavr"ga va Sazonovning "Torino"ga transferlaridan xulosa qiladigan bo‘lsak, Ispaniya, Fransiya va Italiya chempionatlariga Rossiyadan transfer oqimi butunlay to‘xtamagan. Ammo Angliya va Germaniya klublari Rossiya bilan oldi-berdi qilishni qat’iy ravishda rad etishmoqda.
Kelajakda TOP-5 chempionatlaridan biriga o‘tish uchun asosiy umidlarimizdan biri - Abbos Fayzullayevning jamoasi "SSKA"ning - "armiya klubi" ekanligi ham yevropalik xaridorlarni qochirishi mumkin.
Shu sababdan, yosh futbolchilarimiz Rossiya chempionatiga o‘tishdan oldin, yuqoridagi faktorlarni ham inobatga olishadi deb umid qilamiz.
