Fors nashrlarida yozilishicha, O‘zbekiston terma jamoasi bir necha marotaba Tehronda Eronga qarshi o‘rtoqlik uchrashuvi o‘tkazishdan bosh tortgan.
Eron terma jamoasining o‘rtoqlik o‘yinlarini tashkil etishdagi muammolariga bag‘ishlangan maqolada, O‘zbekiston terma jamoasi 2018 yildan beri Eronda o‘ynashdan bosh tortib kelayotganligi yozilgan. Bunga, pasportdagi Eronga kirish vizasi (shtampi)ning - kelajakda AQSH, Kanada va Buyuk Britaniya kabi davlatlarga kirishda muammolar keltirib chiqarishi sabab qilib ko‘rsatilgan.
Maqolada ta’kidlanishicha, nafaqat O‘zbekiston terma jamoasi, balki Yevropa va Janubiy Amerikaning ko‘plab terma jamoalari aynan yuqoridagi sabab tufayli Eronga kelishdan bosh tortishmoqda. Bundan tashqari, Eron futbol federasiyasining kuchli raqiblarni olib kelish uchun moliyaviy imkoniyatining yo‘qligi ham, nomdor terma jamoalarning Tehronga tashrif buyurishiga to‘siq bo‘lmoqda.
2024 yilning 4 yanvar kuni Osiyo kubogiga jo‘nab ketish oldidan Tehronda Indoneziya terma jamoasiga qarshi o‘tkazilishi lozim bo‘lgan o‘rtoqlik uchrashuvi ham, mehmonlarning o‘yinni Turkiyada o‘tkazish qarori tufayli bekor qilingan.
