O‘zbekiston Respublikasi Prezidentining 2023 yil 3 noyabrdagi «Futbol-ta’lim muassasalari tarmog‘ini kengaytirish hamda xalqaro standartlarga mos keladigan futbol infratuzilmasini rivojlantirish chora-tadbirlari to‘g‘risida»gi Qarori ijrosini ta’minlash yuzasidan sa’y-harakatlar davom etmoqda.
Bugun O‘zbekiston futbol assosiasiyasida Yoshlar ishlari va sport vazirligi hamda Raqamli texnologiyalar vazirligi mutaxassislari ishtirokida yig‘ilish bo‘lib o‘tdi.
«Futboli rivojlangan mamlakatlar tajribasidan kelib chiqib, futbolimizga zamonaviy raqamlashtirish tizimini joriy etishimiz zarur. Ommaviy va professional, ayollar hamda bolalar futbolini qamrab oluvchi platforma ushbu sport turining rivoji uchun xizmat qiladi. Maqsadimiz, mamlakatimizdagi har bir futbolchining faoliyati haqidagi ma’lumotlar mavjud bo‘lgan yagona elektron bazani yaratishdan iborat», dedi O‘FA birinchi vise prezidenti Ravshan Irmatov.
Qarorga ko‘ra 2024 yil 1 martga qadar respublikadagi barcha stadion va futbol maydonlarining yagona elektron reestrini ishlab chiqish belgilangan.
Shuningdek, 2024 yil yakuniga qadar futbol sohasi va futbolchilarni tayyorlashning barcha bosqichlarini raqamlashtirish ko‘zda tutilgan.
