Ўзбекистон Республикаси Президентининг 2023 йил 3 ноябрдаги «Футбол-таълим муассасалари тармоғини кенгайтириш ҳамда халқаро стандартларга мос келадиган футбол инфратузилмасини ривожлантириш чора-тадбирлари тўғрисида»ги Қарори ижросини таъминлаш юзасидан саъй-ҳаракатлар давом этмоқда.

Бугун Ўзбекистон футбол ассоциациясида Ёшлар ишлари ва спорт вазирлиги ҳамда Рақамли технологиялар вазирлиги мутахассислари иштирокида йиғилиш бўлиб ўтди.

«Футболи ривожланган мамлакатлар тажрибасидан келиб чиқиб, футболимизга замонавий рақамлаштириш тизимини жорий этишимиз зарур. Оммавий ва профессионал, аёллар ҳамда болалар футболини қамраб олувчи платформа ушбу спорт турининг ривожи учун хизмат қилади. Мақсадимиз, мамлакатимиздаги ҳар бир футболчининг фаолияти ҳақидаги маълумотлар мавжуд бўлган ягона электрон базани яратишдан иборат», деди ЎФА биринчи вице президенти Равшан Ирматов.

Қарорга кўра 2024 йил 1 мартга қадар республикадаги барча стадион ва футбол майдонларининг ягона электрон реестрини ишлаб чиқиш белгиланган.

Шунингдек, 2024 йил якунига қадар футбол соҳаси ва футболчиларни тайёрлашнинг барча босқичларини рақамлаштириш кўзда тутилган.