Bugun O‘zbekiston ayollar milliy terma jamoasi Toshkentda o‘quv-mashg‘ulot yig‘ilarini boshladi. Vakillarimiz fevral oyida Parij-2024 Olimpiya o‘yinlarining Osiyo mintaqasi 3-saralash bosqichi doirasida Avstraliya terma jamoasiga qarshi ikkita uchrashuv o‘tkazadi.

O‘zbekiston futbol assosiasiyasi birinchi vise-prezidenti Ravshan Ermatov bosh murabbiy Midori Honda bilan futbolchilarning ayni paytdagi holati va imkoniyatlari xususida suhbatlashdi. Ayollar terma jamoasi oldida juda muhim vazifa turganini ta’kidlab, bu yo‘lda O‘FA tomonidan barcha sharoitlar taqdim etilishini ma’lum qildi.

"Eng asosiy maqsadimiz Olimpiya o‘yinlariga yo‘llanma olish. Buning uchun munosib tayyorgarlik ko‘rishimiz kerak. Avstraliyani mag‘lub etishga sizning kuchingiz yetadi. Jamoa avvalgi uchrashuvlarda nimalarga qodir ekanligini ko‘rsata oldi. Butun diqqat-e’tiborimizni ushbu bahsga qaratishimiz shart. Sizga butun O‘zbekiston ishonyapti va umid qilyapti. Sizlar ko‘plab yosh qizlarga sport bilan shug‘ullanishda o‘rnak bo‘lyapsiz. Tarix yozish vaqti keldi" – dedi Ravshan Ermatov.

Uchrashuv yakunida O‘FA birinchi vise-prezidenti bo‘lajak o‘yinlarda jamoaga omad tiladi.