Bir xaftadan keyin, ya’ni 1 mart kuni Superligada futbol  bo‘yicha O‘zbekiston birinchiligi rasmiy uchrashuvlari boshlanadi. Farg‘ona futbolchilari yangi mavsumga Turkiyaning Antalya shahrida tayyorgarlik ko‘rdi. 7 yanvardan 22 fevralgacha "Neftchi" Niderlandiya, Rossiya, Qozog‘iston, Gruziya va Polsha davlatlariga qarashli 12 ta klub bilan o‘rtoqlik-nazorat bellashuvlari o‘tkazib, ularning 5 tasida g‘alaba qozongan bo‘lsa, 4 tasini durang va 3 tasini mag‘lubiyat bilan yakunladi.

"Natija qanday bo‘lishidan qat’iy nazar bu uchrashuvlar futbolchilarimizning jismoniy, texnikaviy va ruhiy jihatdan chiniqishlari, malaka va mahoratlarini zamonaviy talablar asosida oshirishlariga yordam berdi. Hamshaharlarimiz Turkiyadagi tayyorgarlik jarayonlarini yakunlab bugun Toshkentga qaytib keladilar", - deyiladi klub xabarida.

Eslatib o‘tamiz, Vitaliy Levchenko shogirdlari yangi mavsumning dastlabki uchrashuvini Jizzax shahrida mahalliy "So‘g‘diyona" jamoasi bilan o‘tkazadi.