Superliga 2-turidan o‘rin olgan "Qizilqum" – "Surxon" (2:1) uchrashuvidan so‘ng navoiyliklar bosh murabbiyi Jamshid Saidov o‘z fikrlarini bildirib o‘tdi.
"G‘alabaga erishganimizdan xursandman. Qatorasiga ikkinchi o‘yinki, ikkinchi bo‘limda yaxshi harakat qila olmayapmiz. Menimcha, bu psixologiyaga bog‘liq. "Bunyodkor" bilan bellashuvda tanaffusga qadar 3:0 hisobida oldinda edik. Ikkinchi taymda esa yigitlar g‘alabaga erta ishonib qo‘yishmoqda. Shunga qaramay, 3 ochkoni qo‘lga kirita oldik. Bu yerda jismoniy tayyorgarlik yomon demagan bo‘lardim. Bu jihat kelgusi turlargacha iziga tushib ketadi.
"Qizilqum" oldiga o‘tgan yilgidan yaxshi natija qayd etish vazifasi qo‘yilgan. "Nasaf" va "Lokomotiv"ga qarshi uchrashuvlarda ham bor kuchimiz bilan o‘ynashga intilamiz. Chempionatda yengil o‘yinlar yo‘q.
E’tibor qaratgan bo‘lsangiz, biz hujumchisiz maydonga tushyapmiz. G‘iyosov va Lobjanidze jarohati sabab jamoamizga yordam bera olmayapti", - dedi Saidov.
