Milliy Olimpiya qo‘mitasida O‘FA rahbariyati va O‘zbekiston U-23 terma jamoasi bosh murabbiyi Timur Kapadze ishtirokida matbuot anjumani bo‘lib o‘tmoqda.
"O‘tgan uch yil davomida ancha o‘sishga erishdik, ikkita yirik musobaqada ishtirok etdik. Ushbu turnirlarda ham, o‘ylaymanki, munosib ishtirok etdik. Endilikda bizni muhim musobaqa kutib turibdi. Umid qilamanki, Qatardagi musobaqada hammamizning orzularimiz ushalib, Parij Olimpiadasiga yo‘llanmani qo‘lga kiritish nasib qilsin.
Tartib-intizom haqida:
"Bizda bu borada muammolar yo‘q. To‘g‘ri yigitlar yosh. Ba’zi vaziyatlar, kartochkalar bilan bog‘liq holatlar ham bor. Biroq biz bu ustida doimiy ishlab boryapmiz.
Tayyorgarlik haqida:
"Bizda har bir futbolchi tarkibga munosib. Biz bir futbolchiga ishonib qolmaymiz. Bu futbol. Kim 23 talik yakuniy ro‘yxatga kirsa, o‘sha tayyor bo‘ladi. Biroq legionarlarimiz bilan biz yanada kuchliroqmiz. Chunki ular Milliy terma jamoamizda ham asosiy tarkib futbolchilari hisoblanadi.
Qatarga qarshi o‘yin foydali bo‘ldi. Guruh bosqichida ham oson o‘yin yo‘q. Raqiblarimiz ham o‘sgan. Nasib bo‘lsa, guruhdan albatta chiqamiz.
O‘yinlar rejasi, darvozabonlar haqida:
"O‘z uslubimiz, rejamiz bor. Lekin bu raqibga qarab ham o‘zgarib boradi, albatta. Osiyo o‘yinlarida ham raqiblarimizga qarab reja bo‘yicha ishladik.
Darvozabonlar masalasida kimga ko‘proq ishonch berish borasida hali aniq qarorga kelmadik. Hali ham ishlayapmiz. Kim tayyor bo‘lsa, o‘zini yaxshi his qilsa, o‘sha o‘ynaydi.
Intizom haqida keladigan bo‘lsak, yigitlar bu turnirning darajasini tushunib turibdi. Umid qilamiz, bu borada muammo bo‘lmaydi.
Vitaminizasiya haqida:
"Vitaminizasiya borasida muammo yo‘q. Tiklanish jarayoniga ham jiddiy qarayapmiz. Terma jamoalar bu masalaga alohida e’tibor qaratishadi.
Parij Olimpiadasiga katta futbolchilarni jalb etish haqida:
"Milliy jamoada ham kuchli futbolchilar yetarlicha. Bu rejamizda bor, kengaytirilgan tarkibda ularni ham jalb qilamiz. Avvalo, Olimpiada yo‘llanmasini hal qilaylik, bu borada ham o‘ylab ko‘ramiz" - dedi Kapadze.
