Xabaringiz bor, 18 may kuni Superliganing 8-turiga start beriladi. Shu kuni «Andijon» klubi «Bobur arena»da «Metallurg»ni qabul qiladi.

Mazkur klublarning ham o‘zaro o‘yinlar tarixi mavjud.

Jamoalar O‘zbekiston chempionatlari tarixida shu kunga qadar 42 bor maydonda bellashishgan. «Andijon»da 13, «Metallurg» hisobida 18 ta g‘alaba bor. Yana 11 ta o‘yinda kuchlar teng kelgan. To‘plar nisbati 61-69, mehmonlar foydasiga.

«Andijon» va «Metallurg» klublari ilk bor 1998 yilning 8 iyun kuni Andijonda kuch sinashishgan. O‘shanda mezbonlar 2:1 hisobida g‘alaba qozongan. O‘tgan yili «Andijon» «Metallurg»ni 5:0 hisobida tor-mor keltirgan. Ikkinchi davrada Bekoboddagi o‘yinda maydon egalari 2:0 hisobida ustunlikka erishishgan.

Eslatib o‘tamiz, Superliganing 8-turidan o‘rin olgan «Andijon» – «Metallurg» bahsi 18 may kuni soat 19:00 da boshlanadi.