O‘zbekiston Superligasining 8-turidan o‘rin olgan “Navbahor” – “Neftchi” jamoalari o‘rtasidagi uchrashuv arafasida “lochinlar”ning 28 yoshli eronlik tajribali yarim himoyachisi Siyavash Haqnazari bo‘lajak o‘yin haqidagi fikrlari bilan o‘rtoqlashdi.
- “Vodiy derbisi” bahslari, ayniqsa, “Neftchi”ga qarshi o‘yinlar doimo murosasiz, keskin kurashlar ostida va shiddatli tarzda kechgan.Bu safargi bellashuv ham bundan mustasno bo‘lmaydi, albatta. Joriy mavsumda har ikki jamoa o‘z oldiga yuksak maqsadlar qo‘yganligi, shuningdek, turnir jadvalida ham yuqori pog‘onalarni egallab turganligi bo‘lajak o‘yinga bo‘lgan qiziqishni yanada oshirishi, intriga hosil qilishi turgan gap.
Bunday darajadagi bahslarning qanday ahamiyatga ega ekanligini biz – futbolchilar ham tushunib turibmiz va ushbu o‘yinda maydonga o‘zgacha ishtiyoqda tushib, g‘alaba qozonish hamda muxlislarga quvonch ulashish uchun barcha imkoniyatimizni ishga solamiz.
Ishqibozlardan esa jamoamizni bevosita stadionda munosib tarzda qo‘llab-quvvatlab, g‘alabamizga madadkor bo‘lishlarini so‘rab qolaman.Biz esa ularning ishonchlarini oqlashga harakat qilamiz, - dedi Siyavash Haqnazari.
