Superliganing qoldirilgan 6-turi doirasidagi «Dinamo»-«Olimpik» (0:1) o‘yinidan so‘ng jamoamiz ustozi Timur Kapadze o‘z fikrlarini bildirib o‘tdi.

— Yigitlarni va jamoamizning boshqa a’zolarini g‘alaba bilan tabriklayman. Qiyin uchrashuv bo‘ldi. Terma jamoadagi o‘yinlardan so‘ng chempionat uchrashuvlariga qaytish qiyinchiliklar tug‘diradi. Shunga qaramay, g‘alaba qozondik. Boshqa yigitlarga ham imkon berdik.

Endi keyingi o‘yinga tayyorgarlik ko‘ramiz. Chunki, bizda ketma-ket 6 ta o‘yin bor. «Dinamo»ga omad tilayman. Jamoa doimo yaxshi o‘yin ko‘rsatadi, tayyorgarlik jarayonida jamoani ham yaxshi o‘rganib chiqdik.

Biz yaxshi tayyorgarlik ko‘ra oldik, ularga imkon bermadik. Jamoaga keyingi o‘yinlarda omad tilayman.

— O‘yin sizning iltimosingiz bilan qoldirildi. Bu nima bilan bog‘liq edi?
— Olimpiadada yarim jamoa «Olimpik»dan edi. Kelganimizdan so‘ng tadbirlar bor edi. Ikki kun ichida o‘yin o‘tkaza olmasdik. Biz terma jamoa sharafini himoya qilish uchun borgandik. Shuning uchun uchrashuvni qoldirishni iltimos qildik. Buni barcha to‘g‘ri tushundi deb o‘ylayman. Keliboq, ikki kundan so‘ng o‘ynash mantiqqa to‘g‘ri kelmaydi.

Bugungi rotasiya haqida gapirsak, futbolchilarimizning ba’zilari Mali bilan o‘yinda ham ishtirok etishdi. Shuning uchun ularni zaxirada qoldirdim.

— Odilov va Bo‘riyevning tushishi o‘yinni kuchaytirdi. Mish-mishlarga qaraganda, ular boshqa jamoaga o‘tishi kutilmoqda. “Olimpik" missiyani bajardi va endi jamoaning taqdiri qanday bo‘ladi?

— Eng avvalo jamoa yil oxirigacha bo‘lishi aniq. Keyinchalik ko‘ramiz nima bo‘ladi. Hozir kelasi Olimpiada uchun ham jamoa tuzilgan. Barchasi rahbariyatning qaroriga bog‘liq.

Futbolchilarimiz uchun yaxshi takliflar bo‘lsa, ularni qo‘yib yuboramiz. Boshqa yigitlar bor va biz seleksiyaga e’tibor qaratamiz.

— Olimpiada haqida. Siz tarkibni aniqlab olganmisiz?
— Olimpiadada 18 nafar futbolchi ishtirok etadi. Bu holatda qisqarish bo‘lgan, shuningdek yoshi kattalar ham bor. Men barcha futbolchilarni kuzatyapman. Biz Olimpiadaga kuchli jamoa bo‘lib borishimiz kerak. Eng kuchli va munosiblar borishi lozim. Hozir aniq javob berishga qiynalaman. Eng asosiysi, barcha sog‘-salomat bo‘lsin.