22 iyun kuni Saudiya Arabistonida bo‘lib o‘tadigan UFC turnirining asosiy jangida rossiyalik jangchi Ikram Aliskerov BAA vakili Hamzat Chimayev o‘rnini egallaydi.

Chimayev sog‘lig‘i bilan bog‘liq muammolar tufayli avstraliyalik Robert Uittakerga qarshi jangda qatnasha olmaydi. 

Chimayev va Uittaker o‘rtasidagi jang 22 iyun kuni Ar-Riyodda bo‘lib o‘tadigan UFC Saudi Arabia turnirining asosiy sarlavhasi bo‘lishi kerak edi.

Avvalroq jangchi Muhammad Eskirxonov ijtimoiy tarmoqlarda Chimayevning kasalxonada yotgani aks etgan suratni chop etgan edi.

Keyinroq UFC matbuot xizmati bo‘lajak jangda Chimayev o‘rniga rossiyalik Ikram Aliskerov maydonga tushishi haqida xabar berdi.

Chimayevning menejeri Mahdi Shammasning aytishicha, jangchi Uittakerga qarshi jangga tayyorgarlik ko‘rayotganda bir necha bor kasalxonaga yotqizilgan. “Kasallik jiddiy edi va unga tayyorgarlik ko‘rishga imkon bermadi.

U hech qachon tiklana olmadi, shu bois jangdan voz kechib, kasalxonaga borishga qaror qilindi”, — dedi Shammas. Menejerning so‘zlariga ko‘ra, Chimayev kasalxonaga yotqizilganidan keyin bir necha oydan so‘ng tuzalib ketadi.