Angliya terma jamoasi yarim himoyachisi Jud Bellingem Yevro-2024 chorak finalida Shveysariyaga qarshi o‘yinda jamoasining o‘yinini yuqori baholadi.

Inglizlar asosiy vaqtda Bukayo Sakaning 80-daqiqada urgan goli evaziga mag‘lubiyatdan qutulib qolishdi. Penaltilar seriyasida “Uch sherlar” beshta zarbani ham golga aylantira oldi, shveysariyaliklar bitta xatoga yo‘l qo‘yishdi - Manuel Akandji tepgan to‘pni Jordan Pikford qaytardi.

“Umuman olganda, bu bizning turnirdagi eng yaxshi o‘yinimiz bo‘lsa kerak. Penaltilar seriyasida xarakter ko‘rsatdik. Bunday bosim ostida zaxiradan maydonga tushgandan so‘ng maqsadga erishish - bu alohida narsa.

Men ham jamoamizdagi barcha kabi penaltilarga tayyorgarlik ko‘raman. Yaxshi tayyorgarlik sizni xotirjam his qilishda yordam beradi”, dedi Bellingem.