20 sentyabr kuni Polshaning Xoynise shahrida professional boks turniri o‘tkaziladi.
Biz uchun ahamiyatlisi, Babilon Promotion promouterlik kompaniyasi tomonidan tashkil etilayotgan ushbu boks oqshomining markaziy jangida hamyurtimiz Sherzod Husanov ringga ko‘tariladi. Tajribali bokschimiz polshalik Pavel Stepinga qarshi jang o‘tkazadi. Husanov murabbiylari bilan birga Polshaga jo‘nab ketdi.
Taqqoslash uchun, 34 yoshli mezbon bokschi prof faoliyati davomida 21 ta jang o‘tkazib, 19 g‘alaba, 1 ta mag‘lubiyat va 1 ta durang qayd etgan. O‘n ikkita jangda raqiblarini muddatidan avval taslim etgan. Faoliyatidagi 20 ta jangini o‘z vatanidagi boks oqshomlarida o‘tkazgan. Faqat bir marotaba Angliyaning Birmingem shahrida tashkil etilgan boks kechasida britaniyalik taniqli charm qo‘lqop ustasi Joshua Buatsiga qarshi ringga chiqib, mag‘lubiyatga uchragan.
Shu yil yanvar oyida 44 yoshini qarshilagan, 2007 yildan beri prof ringda jang o‘tkazib kelayotgan Sherzod Husanovning hisobida 28 ta jang bor. U 24 g‘alaba (12 nokaut), 3 mag‘lubiyat va 1 durang natija qayd etgan. U shu yil aprel va may oylarida Andijonda o‘tgan prof boks kechalarida mos ravishda Odiljon Jo‘raboyev va G‘iyosbek Mamajonovni mag‘lubiyatga uchratgan.
