«So‘g‘diyona» – «Andijon» (1:1) o‘rtasidagi o‘yindan keyingi matbuot anjumanining ikkinchi qismida mezbonlar bosh murabbiyi Ivan Boshkovich qatnashdi.

«O‘ylaymanki, o‘yin juda qiziqarli bo‘ldi. Men o‘ylagandek davom etdi, yigitlar ham yaxshi harakat qilishdi. 35-daqiqagacha o‘yin ko‘nglimdagidek kechdi. 35-daqiqadan so‘ng o‘yin tizginini qo‘ldan chiqardik. Bir qator xatoliklarga yo‘l qo‘ydik. Qanotlarda ham ba’zi vaziyatlarda o‘yinimiz o‘xshamadi. Raqib ham o‘z o‘rnida yaxshi o‘yin ko‘rsatganini aytishim lozim.

Tanaffusda yigitlarga hammasini tushuntirgandim. Xotirjamlikka berilmaslik kerakligini ta’kidlagandim. Afsuski, ayrim holatlarda bee’tibor bo‘lib qolganimiz sababli darvozamizdan to‘p o‘tkazib yubordik.

To‘g‘ri, raqibimiz ham yaxshi harakat qildi. Ular ham kurashishmoqda. «Andijon» uchun hozirgi vaziyatda ochko juda muhim edi. Shu bois raqib a’zolari xarakter ko‘rsatishdi va ko‘zlangan rejasiga erishishdi. G‘alaba qozonish uchun yurakda «olov yonib» turish kerak. G‘alabani juda ham xohlash kerak. Men bu gapim bilan g‘alabani istamadik, demoqchi emasman. Futbolchilar buni xohlashdi. Yigitlar imkoniyatlarni yaratishdi. Biroq hal qiluvchi vaziyatlarda aniqlik yetishmadi.

«Andijon»ning o‘yinini ham to‘g‘ri baholash kerak. Ular ham bir qator vaziyatlarda xavfli o‘yin ko‘rsatishdi. Ayniqsa, qarshi hujumlarda ajoyib o‘yin namoyish qilishdi. Hattoki, raqibimiz oxirgi daqiqalarda g‘alaba qozonib ketishi ham mumkin edi. Biz yomon o‘ynadik, deb ayta olmayman. Afsuski, 1:0 dan keyin o‘yinni biroz «tashlab» yuborgan holatlarimiz ham bo‘ldi. Bunday qilish kerak emas. Futbolni 90 daqiqa yuqori tempda o‘ynash kerak. O‘yin tugadi, keyingi uchrashuvlarga tayyorgarlik ko‘ramiz. Har bir bahsda natija uchun oxirigacha kurashish muhim. O‘ylaymanki, bunday bolalarcha xatolarga yo‘l qo‘ymasligimiz darkor. G‘alaba qozonayotgan paytda bo‘shashmaslik shart».