"Sporting" o‘zining shvesiyalik to‘purari Viktor Dyokereshni boshqa klubga qo‘yib yuborishga tayyor va hatto uning narxini pasaytirdi.
Bu haqda The Telegraph nashri xabar bermoqda.
Manbaga ko‘ra, Lissabon klubi 26 yoshli shvesiyalik futbolchiga 2025 yilning yozida jamoani tark etishiga ruxsat beradi. Shuningdek, "Sporting" futbolchining shartnomasidagi tovon pulini 83 million funtdan 63 million funtga kamaytirishga tayyor.
Forvardning klub bilan amaldagi shartnomasi 2028 yilning yoziga qadar mo‘ljallangan.
Joriy mavsumda hujumchi "sherlar" safida barcha turnirlar doirasida 15 ta o‘yin o‘tkazib, 23 ta gol urdi va 2 ta golli uzatmani amalga oshirdi.
Dyokereshning transferiga Angliya Premyer-ligasining bir qancha klublari qiziqish bildirmoqda. Asosiy da’vogar "Manchester Yunayted" bo‘lib, uni tez orada "Sporting"ning hozirgi ustozi Ruben Amorim boshqaradi.
