«Manchester Yunayted» yarim himoyachisi Brunu Fernandesh Yevropa ligasi doirasida «Viktoriya»ga (2:1) qarshi o‘yinda darvozabon Andre Onananing xatosi haqida fikr bildirdi.

Kamerunlik darvozabon o‘z darvozasi yaqinida Matteys de Ligtga noaniq uzatma berdi - Chexiya jamoasi «sovg‘a»dan unumli foydalanib, 48-daqiqada hisobni ochishdi. Mehmonlar Rasmus Xyoylunnning dubli evaziga o‘yinni o‘zgartirib, g‘alaba qozonishga muvaffaq bo‘ldi.

«Biz o‘z darvozamiz atrofida kamroq o‘ynamoqchimiz va hamma biladi, buning uchun to‘p bilan to‘g‘ri qaror qabul qilishimiz kerak. Andre De Ligt to‘pni qabul qila oladi deb o‘ylagandi, ammo u buni uddalay olmadi va raqiblar gol urishdi.

Bu Onananing aybi emas - baxtsiz hodisa sodir bo‘lganda, biz hech kimga aybni yuklamasligimiz kerak. Biz Andrega qattiq ishonamiz. U aqlli yigit va u xato qilganini biladi, lekin u bizga yana ko‘p marta yordam beradi. Biz uning to‘p bilan ishlash qobiliyatiga ishonamiz. Xatolar futbolning bir qismidir, ularsiz futbol bo‘lmaydi», - deya Fernandesh so‘zlarini keltiradi «BBC».