Bugun Rossiya Federasiyasi poytaxti Moskva shahrida boks bo‘yicha nvbatdagi IBA Champions' Night turniri o‘tkaziladi.
Biz uchun ahamiyatlisi, "Lujniki" majmuasi mezbonlik qiladigan ushbu boks oqshomida hamyurtimiz Saidjamshid Jafarov ham o‘zining navbatdagi jangini o‘tkazadi. U rossiyalik Dmitriy Zaxarovga qarshi ringga ko‘tariladi. 71 kg vazn toifasida tashkil etiladigan 6 raundlik jang IBA Pro European Champion kamari uchun kechadi.
Kecha bokschilar rasmiy tarozidan o‘tish hamda face to face marosimlarida ishtirok etishdi. Saidjamshid ham, Dmitriy ham belgilangan vazn me’yorini bajargan. Turnirning co-main event jangi og‘ir vazn toifasida o‘tkaziladi va unda Bahodir Jalolovning sobiq raqibi belgiyalik Jek Mulovayi rossiyalik Artem Suslenkov bilan to‘qnash keladi. Mazkur 10 raundlik jang g‘olibi ham IBA Pro European Champion kamarini qo‘lga kiritadi.
Oqshomning markaziy jangi esa superog‘ir vaznda rossiyalik Muslim Gadjimagomedov hamda Janubiy Afrika Respublikasi bokschisi Mchunu Tabiso o‘rtasida bo‘lib o‘tadi. O‘n raundlik jang g‘olibi IBF Europe kamariga ega chiqadi.
Ma’lumot uchun, Saidjamshid so‘nggi jangini o‘tgan yilning 30 noyabr kuni Rossiyaning Yekaterinburg shahrida tashkil etilgan RCC Boxing Promotions promouterlik kompaniyasi turnirida rossiyalik Gor Oganesyanga qarshi o‘tkazib, ochkolar hisobiga ko‘ra g‘alaba qozongandi. Bu havaskor boksda jahon chempionati sovrindori bo‘lgan Saidjamshidning prof boksdagi debyut jangi bo‘lgandi.
