1 fevral kuni “Humo” xokkey klubi muntazam chempionatning so‘nggi o‘yinini Ostona shahrining “Nomad” jamoasiga qarshi o‘tkazdi. “Humo” 3:1 hisobida g‘alaba qozonib, muxlislarini xursand qildi.

Uchrashuv yakunida arenada muxlislar juda yaxshi ko‘radigan xayrli an’ana – Mishkopad, ya’ni yumshoq o‘yinchoqlar yomg‘iri bo‘lib o‘tdi. Otilgan 1 312 ta yumshoq o‘yinchoq "Humo Arena" muz maydoniga tushib, barcha ishtirokchilarga unutilmas his-tuyg‘ularni taqdim etdi.

Endilikda ushbu o‘yinchoqlar kam uchraydigan og‘ir irsiy kasalliklarga chalingan bolalarga, Respublika bolalar ijtimoiy moslashuvi markaziga yuboriladi. Aksiya “SMA UMID” va “ISHONCH” jamg‘armalari ko‘magida o‘tkazilmoqda.

“Humo” xokkeychilari uchun esa mavsumning eng muhim pley-off bosqichi oldinda. Jamoa unda chempionlik uchun kurashadi.