Saudiya Pro ligasining 19-turidan o‘rin olgan “An-Nasr” va “Al-Feyha” klublari o‘rtasidagi uchrashuv kecha, 8 fevral kuni bo‘lib o‘tdi.

Uchrashuvda mezbonlar yirik 3:0 hisobida g‘alaba qozondi. “An-Nasr” tarkibida Duran dubl qayt etgan bo‘lsa, 3-golga portugaliyalik Ronaldu mualliflik qildi.

“Al-Feyha” tarkibida O‘zbekiston milliy jamoasi a’zosi Otabek Shukurov asosiy tarkibda maydonga tushdi va 79 daqiqa harakat qildi. Sofascore nashri futbolchining o‘yinini 6,7 ballga loyiq ko‘rdi. Mehmonlar tarkibida hujumchi Renzo Lopez eng ko‘p 6,9 ball olgan.

Mezbonlar tarkibida ikkita gol urgan Duran eng yuqori 9,1 ball bilan baholandi va o‘yinning eng yaxshi futbolchisi sifatida e’tirof etildi. Sadio Mane 8,3 ballga loyiq ko‘rilgan bo‘lsa, Ronalduga 7,1 ball qo‘yildi.

“An-Nasr” ushbu g‘alabadan so‘ng ochkolari sonini 41 taga yetkazib oldi va turnir jadvalining 3-o‘rnida bormoqda. “Al-Feyha” 16 ochko bilan 14-o‘ringa joylashgan.