Futbol bo‘yicha Elit Osiyo chempionlar ligasining umumiy bosqichi so‘nggi, 8-tur o‘yinlari bo‘lib o‘tdi.

Turning ilk uchrashuvi Toshkent shahridagi "JAR" stadionida o‘tkazildi. “Paxtakor” – “As-Sadd” klublari o‘rtasidagi o‘yinda poytaxtimiz klubi 2:1 hisobida zafar quchdi. Shuningdek, mazkur turda “Ash-SHorta” – “Al-Ayn” 2:0, “Persepolis” – “An-Nasr” 0:0, “Al-Ahli” – “Al-Garafa” 4:2 hisoblari qayd etildi.

Bugun, 18 fevral kuni liganing 8-turi doirasida ikki uchrashuv bo‘lib o‘tadi. Unda “Ar-Rayyan” – “Istiqlol”, “Al-Hilol” – “Al-Vasl” klublari o‘zaro raqobatlashadi.

Shuni ta’kidlab o‘tishimiz lozimki, kechagi uchrashuvlardagi qayd etilgan natijadan so‘ng “Paxtakor“ musobaqaning pley-off bosqichiga yo‘l oldi. Aniqroq aytadigan bo‘lsak, “Paxtakor“ 7 ochko bilan 7-o‘rindan joy oldi. Bugun “Istiqlol“ safarda “Ar-Rayyan“ ustidan g‘alaba qozonsa, “Paxtakor“ sakkizinchi o‘rinni egallaydi. Eronliklar durang yoki mag‘lubiyat qayd etadigan bo‘lsa, “Paxtakor“ yettinchi o‘rin bilan pley-off bosqichiga yo‘l oladi.

Elit OCHL reglamentiga ko‘ra, g‘arb mintaqasida 1-o‘rinni egallagan jamoa shu mintaqadagi 8-o‘rin, 2-o‘rinni egallagan jamoa esa 7-o‘rin egasi bilan bahs olib boradi. Hozirda musobaqa jadvalining eng yuqori ikkita o‘rnini "Al-Hilol" va “Al-Ahli" klublari egallab turibdi. Shundan kelib chiqib, "Paxtakor" 7 yoki 8-o‘rin bilan pley-offga yo‘l olsa, poytaxtimiz klubining navbatdagi bosqichdagi raqibi "Al-Hilol" yoki "Al-Ahli" bo‘ladi.

Eslatib o‘tamiz, OFK qaroriga ko‘ra, liganing pley-off bosqichidagi ilk o‘yin jadvalda pastroq o‘rinni egallagan jamoa maydonida o‘tadi. Aniqrog‘i, “Paxtakor“ ushbu bosqichdagi birinchi uchrashuvni o‘z uyida o‘tkazadi. 1/16 finalning ilk uchrashuvlari esa 3-4 mart kuniga belgilangan.