Xabar berganimizdek, "Andijon"ning "Zenit"-2 ga qarshi o‘yinni Rossiya futbolining afsonalaridan biri Andrey Arshavin ham bevosita stadionda kuzatib bordi.
Aytib o‘tganimizdek, u hozirda "Zenit" klubi boshqaruv raisining sportni rivojlantirish bo‘yicha o‘rinbosari sifatida ishlab kelmoqda.
O‘yindan keyin Arshavin "Andijon" matbuot xizmati uchun bellashuv borasidagi fikrlarini bildirdi.
"O‘yindagi ustunlik to‘liq sizning jamoaningizda bo‘ldi. Ikkinchi bo‘limda esa almashtirishlardan so‘ng bizning jamoa yaxshi o‘yin ko‘rsatdi. O‘zi bu kabi bahslarda, yig‘inlarda bunday bo‘lishi oddiy hol. Aynan yig‘in uchun mos va xos bellashuvlar sirasiga kiradi. O‘yindan qoniqdik.
Kubok sohibi bo‘lganinglarni olqishlayman. O‘zaro o‘yinimiz oldidan klubingiz haqida materiallarni o‘rganib chiqdik.
Hujum chizig‘idagi futbolchilaringiz ancha tezkor. Ular himoyachilarimizga bir muncha muammolar tug‘dira oldilar. Adashmasam, sizlarda o‘tgan yili rossiyalik futbolchi Luka Zgurskiy ham o‘ynagan".
