O‘zbekiston U-17 terma jamoasi Saudiya Arabistonida o‘tgan o‘smirlar o‘rtasidagi Osiyo kubogida tarixiy natija qayd etib, g‘oliblikni qo‘lga kiritdi. FIFA rasmiy sayti jamoamizning ushbu muvaffaqiyati haqida maqola e’lon qildi.

O‘zbekiston 9 nafar futbolchi bilan Saudiya Arabistonini mag‘lub etib, Osiyo kubogida zafar quchdi. Qiziq jihati shundaki, Jamoa tarkibidagi hujumchi Nurbek Sarsenbayev va himoyachi Miraziz Abdukarimov birinchi bo‘lim oxirida maydondan chetlatilganiga qaramay, ikkala gol ham aynan shundan so‘ng kiritildi.

Turnir davomida a’lo darajada o‘ynagan Islombek Ismoilov boshchiligidagi jamoa Toif shahridagi "Qirol Fahd" stadionida hujumkor o‘yin ko‘rsatishda davom etdi.

Ikkinchi bo‘lim boshida himoyachi Muhammad Hakimov penalti orqali hisobni ochdi, 70-daqiqada esa qanot hujumchisi Sadriddin Hasanov chiroyli harakatlari evaziga g‘alabani mustahkamladi. Hasanov bu turnirda ko‘rsatgan yuqori saviyali o‘yini uchun musobaqaning eng yaxshi futbolchisi, deb e’tirof etildi.

O‘zbekiston so‘nggi sakkizta qit’a turnirining yettitasida kamida chorak finalgacha yetib borgan va 2023 yilda Indoneziyada o‘tgan so‘nggi jahon chempionatida ham shu bosqichgacha yetib kelib, yaxshi taassurot qoldirgandi, — deyiladi FIFA xabarida.