Ozarbayjonning Mingechaur shahrida akademik, baydarka va kanoeda eshkak eshish bo‘yicha an’anaviy “President cup – 2025” xalqaro regatasi start oldi.
Unda Yevropa, Osiyo, Afrikaning 20 ta davlatidan tashrif buyurgan 200 dan ziyod eshkak eshuvchilar ishtirok etmoqda. Quvonarlisi ular orasida O‘zbekiston terma jamoasi a’zolari ham bor.
Nufuzli musobaqada Luiza G‘afurova qo‘l ostidagi akademik eshkak eshish bo‘yicha terma jamoamiz tarkibidan Sarvar Mamarasulov, Laziz Qo‘chqorov, Akmal Yo‘ldoshev va Elbek To‘raqulov o‘rin olgan bo‘lib, g‘oliblik da’vosida bahslarga kirishdi. Shuni ta’kidlab o‘tishimiz lozimki, jamoamiz murabbiyi L.G‘afurova 3-6 may kunlari Boku shahrida va 6-9 may kunlari Istanbulda o‘tadigan xalqaro seminarlarda ham qatnashadi.
Darvoqe, 2 may kuniga qadar davom etadigan “President cup – 2025” xalqaro regatasi doirasidagi baydarka va kanoeda eshkak eshish bo‘yicha bellashuvlarda Danil Kryukov, Maksim Ivliyev, Zafar Baxtiyorov va Behruz Ergashevdan tashkil topgan jamoamiz murabbiy Sherzod Abdurahimov boshchiligida ishtirok etadi.
Eslatib o‘tamiz, o‘tgan yilgi “President cup – 2024” xalqaro regatasida Behruz Ergashev kanoeda eshkak eshishda 200, 500 va 1000 metr masofalarda oltin medalni qo‘lga kiritgan edi. Akademik eshkak eshishning yakkalik dasturida Jamol Turg‘unov oltin va Laziz Qo‘chqorov kumush, baydarkada eshkak eshishda Marsel Xalilov bronza medaliga ega chiqqan edi.
Juftliklar yo‘nalishining baydarka qayig‘ida o‘tgan ming metr masofadagi bahslarda Ivan Gerasimenko/Aziz G‘aybullayev tandemi, akademik eshkak eshishda Jamol Turg‘unov/Kamol Rahimov hamda Laziz Qo‘chqorov/SHahriyor G‘aybullayev shohsupaning eng yuqori pog‘onasidan o‘rin olgan edi.
