«Lochin» – «Andijon» (2:1) uchrashuvidan keyingi matbuot anjumanida mehmonlar bosh murabbiyi Aleksandr Xomyakov o‘z fikrlari bilan o‘rtoqlashdi.

— «Lochin» jamoasini g‘alaba bilan tabriklayman. Ular harakat qilishdi, ular chidashdi va o‘z maqsadiga erishishdi. Keyingi o‘yinlarda jamoaga omad tilayman.

— «Andijon»ga nima bo‘ldi? Jamoa amaldagi Kubok egasi edi. Ammo bu safar guruhdan ham chiqa olmadi.

— Nima ham deyman? Biz uchun o‘yinlar juda qiyin kechyapti, Kubok uchrashuvlarida. Omad biz tomonda bo‘lmadi. Keyingi o‘yinlarga tayyorgarlik ko‘ramiz. Futbol shunday o‘yinki, mahoratdan tashqari xohish ham juda katta muhim rol o‘ynaydi. Biror fikr bildirishim qiyin. Raqib oxirgi vaziyatda bor kuchi bilan harakat qildi va g‘alabani ilib ketdi. Yuqorida aytganimdek, futbolda xohish yuqori bo‘lsa, g‘alaba qozonish mumkin bo‘ladi.

— «Andijon» oldiga mavsum boshida uchta asosiy vazifa belgilab berilgandi. Birinchisi, Kubok finaliga chiqish, ikkinchisi chempionatda sovrindorlar qatoridan joy olish va uchinchisi OCHLda guruh bosqichidan chiqish. Lekin ko‘rib turibmizki, Kubokdan chiqib ketdi. Buni qanday izohlaysiz?

— Albatta, bu yerda muammolarni ko‘rib, tahlil qilib chiqamiz. Himoyadagi va hujumdagi kamchiliklarni o‘rganib chiqamiz. Albatta, chempionatdagi o‘yinlarimizni yaxshilaymiz. Xalqaro uchrashuvlar uchun tajribamizni oshirgan holda maydonga chiqamiz.

— «Lochin» safida sizga manzur bo‘lgan futbolchi kim?

— Yo‘q, men asosan o‘z jamoamning o‘yinchilariga bor e’tiborimni qaratdim. Meni yordamchi murabbiylarim bor. Ular kim qanday harakat qilayotganini kuzatib borishadi. «Lochin» safida ilgari «Mash’al»da men bilan birga ishlagan 4 nafar futbolchi borligini bilaman. Futbolda mahorat bo‘lgani bilan kim xarakter ko‘rsatsa va xohishi yuqori bo‘lsa o‘sha g‘alaba qozonadi. Afsuski, bugun bizda o‘sha narsa bo‘lmadi.