Milanning “Inter” jamoasi so‘nggi uch yil ichida ikkinchi marta Chempionlar Ligasi finaliga yo‘l oldi. “Barselona”ga qarshi juda keskin kechgan o‘yinda jamoaning asosiy qahramonlaridan biri — shveysariyalik darvozabon Yan Zommer bo‘ldi.

Uchrashuvdan so‘ng jurnalistlar undan qaysi seyv eng murakkab bo‘lganini so‘rashdi. Zommer esa quyidagicha javob qaytardi:

“Aniq ayta olmayman, ehtimol, eng oxirgi seyv bo‘lsa kerak. Chunki Yamal juda kuchli futbolchi — u doim jarima maydoniga kirib keladi va qattiq zarba beradi. To‘p to‘rga kirmaganidan juda xursandman.

Biz o‘zimizga ishondik. Ko‘p jamoalar uchinchi golni o‘tkazib yuborgandan so‘ng ruhan sinadi va yutqazadi. Ammo biz oxirigacha ishondik va o‘z maqsadimizga erishdik”, — dedi Zommerning so‘zlarini fcinter1908.it keltirmoqda.