Hujumkor yarim himoyachi Jek Grilish "Manchester Siti"ning klublar o‘rtasidagi jahon chempionatida ishtirok etishi kutilmayapti.
The Athletic nashri xabariga ko‘ra, "shaharliklar" bosh murabbiyi Pep Gvardiola Grilishni AQSHdagi turnirga qo‘shishi dargumon. Ma’lumki, Jek Grilish mavsumni yomon o‘tkazdi. Futbolchi 32 ta o‘yinda qatnashib, 3 ta gol urdi va 5 ta golli uzatmani amalga oshirdi.
29 yoshli Grilishning boshqa klubga ketishi mumkinligi haqida mish-mishlar tarqaldi. Klublar o‘rtasidagi jahon chempionati guruh bosqichida "Manchester Siti"ning raqiblari "Vidad" (18 iyun), "Al-Ayn" (23 iyun) va "Yuventus" (26 iyun) bo‘ladi.
Ayni paytda O‘zbekiston milliy terma jamoasining ertangi muhim o‘yiniga tayyorgarlik ko‘rayotgan Abduqodir Husanovning KO‘JCHga borish yoki bormasligi haqida biror xabar yo‘q.













