Qozog‘iston terma jamoasi bosh murabbiyi Ali Aliyev O‘zbekiston milliy jamoasining Jahon chempionatiga yo‘l olgani yuzasidan o‘z munosabatini bildirib o‘tdi.
Aliyev qo‘shni mamlakat erishgan tarixiy yutuq bilan qutladi va UYEFA safida ishtirok etishning ahamiyatiga to‘xtalib o‘tdi:
"O‘zbekiston terma jamoasini Jahon chempionatiga chiqqani bilan chin dildan tabriklaymiz. Bu — butun xalq uchun ulkan quvonch va tarixiy voqea. Biroq, UYEFAda qatnashish nafaqat raqobatbardoshlik, balki futbol madaniyati va tajriba nuqtayi nazaridan ham juda katta ahamiyatga ega. Masalan, biz Fransiya terma jamoasini Qozog‘istonga olib kelamiz, Mbappe kabi jahon yulduzlarini “Astana Arena”da jonli tomosha qilish imkonimiz bor. Yaqinda Belgiya terma jamoasi ham biz bilan o‘yin o‘tkazadi. Shu bois UYEFAda o‘ynash mamlakatimiz uchun strategik jihatdan muhim", deya ta’kidladi murabbiy.
Eslatib o‘tamiz, Qozog‘iston terma jamoasi 5 iyun, payshanba kuni Belarusga qarshi o‘yinda 1:4 hisobida mag‘lub bo‘ldi.
Hozirda qozog‘istonliklar Belgiya, Uels, Shimoliy Makedoniya va Lixtenshteyn bilan bir guruhda Jahon chempionatiga yo‘llanma uchun kurashmoqda. Saralash bosqichidagi navbatdagi o‘yin 9 iyun, dushanba kuni Shimoliy Makedoniyaga qarshi bo‘lib o‘tadi.
