AQSH poytaxti Vashingtonda joylashgan “Audi Fild” stadionida 2025 yilgi Klublar o‘rtasidagi jahon chempionati guruh bosqichi 1-turidan o‘rin olgan uchrashuv bo‘lib o‘tdi. Unda BAAning “Al-Ayn” klubi Italiyaning “Yuventus” jamoasiga qarshi maydonga tushdi. O‘yin turinliklarning yirik hisobdagi g‘alabasi bilan yakunlandi — 5:0.
11-daqiqada hisobni fransuz hujumchisi Randal Kolo Muani ochdi — unga portugaliyalik himoyachi Albertu Bayo assistentlik qildi. Oradan 10 daqiqa o‘tib, Bayoning yana bir uzatmasidan keyin Fransishku Konseysau ikkinchi golni urdi. 31-daqiqada esa turkiyalik vinger Kenan Yildiz fransuz yarimhimoyachisi Kefren Tyuram-YUlyenning pasidan foydalanib, hisobni 3:0 qildi. Birinchi taymning oxirida Kolo Muani dubl qayd etib, Tyuram-YUlyenning navbatdagi golli uzatmasidan unumli foydalandi.
60-daqiqada esa portugaliyalik Konseysau fransuz himoyachisi Pyer Kalyuluning pasidan keyin ikkinchi bor raqib darvozasini ishg‘ol qildi.
BAAliklar o‘yin davomida bir nechta xavfli vaziyatlar yaratishdi. Ammo "Yuve" posboni o‘z darvozasi daxlsizligini saqlab qoldi.
Klublar o‘rtasidagi jahon chempionati — 2025, "G" guruhi. 1-tur
2025 yil 19 iyun, payshanba
Al-Ayn (BAA) - Yuventus (Italiya) - 0:5
Gollar: 0:1 — Kolo Muani, 11', 0:2 — Konseysau, 21', 0:3 — Yildiz, 31', 0:4 — Kolo Muani, 45+4', 0:5 — Konseysau, 58'













