"Chelsi" hujumchisi Nikolas Jekson "Milan" short-listiga kiritilgan. "Ko‘klar" bosh murabbiyi Enso Mareskaning ishonchini yo‘qotgan futbolchini "rossonerilar" o‘z safiga qo‘shib olishiga ishonmoqda. Bu haqda Daily Mail xabar bermoqda.

Manbaga ko‘ra, londonliklar 24 yoshli futbolchini 100 mln funtga (115 mln yevro) baholamoqda va uni sotishni o‘zlariga ustuvor maqsad sifatida belgilashmayapti.

Ta’kidlanishicha, "Milan" vositachilardan senegallik futbolchini "Chelsi"dan ketishga ko‘ndirish mumkinligi haqida ma’lumot olgan. Shu bilan birga, "rossonerilar" uning transferi uchun 100 mln funt to‘lashga tayyor emas.

O‘tgan mavsumda Jekson barcha musobaqalarda 37 ta o‘yinda maydonga tushib, 13 ta gol va 6 ta golli uzatmani amalga oshirdi.