Mundo Deportivo nashri xabariga ko‘ra, Madridning "Atletiko" klubi "Yuventus"ning argentinalik vingeri Nikolas Gonsales transferini ko‘rib chiqmoqda.

"Matraschilar" Tyago Almadaning transferini allaqachon rasmiylashtirgan bo‘lsa-da, keyingi mavsum uchun hujum chizig‘ini kuchaytirishga intilmoqda. "Atletiko"ning asosiy nishoni "Atalanta" futbolchisi Ademola Lukman bo‘lib qolmoqda, ammo nigeriyalik futbolchi "Inter"ga o‘tishni afzal ko‘rmoqda.

Shu munosabat bilan "Atletiko" muqobil variantlarni faol izlamoqda - ulardan biri aynan Gonsales bo‘ldi. Manbaning ta’kidlashicha, futbolchi jiddiy moliyaviy taklif bo‘lsa, "Yuventus"ni tark etishi mumkin va madridliklar uni allaqachon ustuvorliklar ro‘yxatiga kiritgan. Futbolchiga Saudiyaning "Al-Ahli" klubi ham da’vogarlik qilmoqda, biroq Nikolasning o‘zi hozircha Yevropada qolishni istamoqda.

Eslatib o‘tamiz, Gonsales 2024/25 yilgi mavsumda "Yuventus" safida barcha musobaqalarda 38 ta o‘yinda maydonga tushib, 5 ta gol urgan va 4 ta golli uzatmani amalga oshirgan. Transfermarkt portali uning narxini 24 million yevroga baholamoqda.