"Manchester Yunayted"ning sobiq hujumchisi Lui Saa sobiq jamoasiga taklif bilan chiqdi. Uning aytishicha, "qizil iblislar" "Yuventus"dan Dushan Vlaxovichni sotib olish orqali hujumdagi muammolarini hal qilishlari kerak.
"Mana "Manchester Yunayted" qidirayotgan hujumchi. Uning statistikasi yaxshi, u tajribaga ega, mening nazarimda bu yaxshi xarid bo‘ladi. Jamoaga kafolatli, xarakterli to‘purarlar kerak. Ayni damda ularda timsol uchun o‘ynashga ishtiyoqi yo‘q to‘rt nafar futbolchi bor, bu juda achinarli", - dedi Saa Goal bilan suhbatda.
O‘tgan mavsumda 25 yoshli serbiyalik hujumchi klub miqyosida 44 ta o‘yinda maydonga tushib, 17 ta gol urdi va 5 ta golli uzatmani amalga oshirdi. Vlaxovichning bozor qiymati 35 million yevroga baholanmoqda.
