"Barselona" vingeri Lamin Yamal kattalar futbolidagi uchinchi mavsumga tayyorgarlik ko‘rmoqda. 18 yoshli futbolchi mavsumoldi o‘yinlarini ajoyib o‘tkazdi - 4 o‘yinda 4 gol va 1 golli uzatma. Yakshanba kuni Joan Gamper kubogi finali doirasida "Komo"ga qarshi kechgan bahsda (5:0) yosh ispaniyalik dubl qayd etdi.

Ispaniyaning mashhur Sport nashri jurnalistlarining fikriga ko‘ra, Yamal o‘tgan yorqin kampaniya fonida ham yanada yaxshiroq o‘ynay boshladi: "Endi u yanada tezkor, kuchli va chaqqon o‘yinchi, hujumlarni samaraliroq yakunlaydi," - deb hisoblaydi gazeta muharrirlari.

2024/25 yilgi mavsumda Lamin Yamal Xans-Diter Flik jamoasi safida 55 ta o‘yinda maydonga tushib, 18 ta gol va 25 ta golli uzatmani amalga oshirdi.