Aleksandr Isak endi "Nyukasl"da o‘ynashni istamaydi.

The Athletic xabariga ko‘ra, hujumchi klub uni transfer oynasi yopilguncha qo‘yib yubormasa o‘ynashdan ham bosh tortadi. Isak "Nyukasl"dagi faoliyatining bosqichi tugagan deb hisoblaydi va jamoaga qaytish niyatida emas.

Qayd etilishicha, Isak moliyaviy feyr-pleyga rioya qilish zarurati tufayli o‘tgan yozda klub unga yangi shartnoma taklif qilmagani uchun o‘tgan mavsum yakunida “Nyukasl”ni tark etishga qaror qilgan. Biroq, klubdagi ba’zi manbalarning fikricha, forvard mavsum oxirida vaziyatni muhokama qilish uchun qaytishni rejalashtirgan. Mavsum tugashiga ikki hafta qolganida Isak jamoa bosh murabbiyi Eddi Xouga “Nyukasl”ni tark etish istagi haqida ma’lum qildi.

Isak ayni damda bor e’tiborini "Liverpul"ga o‘tishga qaratgan. Avgust oyi boshida "Nyukasl" forvard uchun 110 million funt sterlinglik taklifni rad etganidan keyin mersisaydliklar hali yangi taklif bilan chiqishmadi.