2025 yilning yozida ayollar va erkaklar futbolida rekord darajadagi transferlar amalga oshirildi, deya xabar bermoqda FIFA matbuot xizmati tashkilot rasmiy saytida. Xususan, erkaklar futbolida 1 iyundan 2 sentyabrgacha bo‘lgan davrda 12 mingga yaqin, ayollar futbolida esa 1100 dan ortiq o‘tish amalga oshirildi.
Transfer xarajatlari 9,76 milliard dollargacha oshdi - bu yozgi transfer oynasi tarixidagi eng yuqori ko‘rsatkichdir. Summa 2024 yilning shu davriga nisbatan 50% ga oshgan.
Xarajatlar bo‘yicha birinchi o‘rinni Angliya egalladi - 3 milliard dollardan ortiq. "Liverpul" bir transfer oynasida yangi futbolchilarni sotib olish uchun sarflangan mablag‘ bo‘yicha rekord o‘rnatdi. "Qizillar" o‘tgan yozda jami 483 mln yevro sarflagandi.
