"Real" futbolchilari hakamlar ularga nisbatan noxolis munosabatda bo‘lmoqda, deb hisoblamoqda.
La Liga 4-turidan o‘rin olgan "Real Sosyedad"ga (2:1) qarshi bahsda madridliklar himoyachisi Din Xeysen maydon markazida qarshi hujumni to‘xtatgani uchun maydondan chetlatildi.
Marca nashrining yozishicha, "qaymoqranglilar" futbolchilari darvozagacha bo‘lgan masofa va uning yonida yana bir himoyachi Eder Militao borligiga qaramay, hakam Xesus Xil Mansano hech ikkilanmay qizil kartochka to‘g‘risida qaror qabul qilganidan hayron bo‘lishgan.
"Real" futbolchilari orasida o‘z jamoasini qattiqroq jazoga tortishayotgani, boshqa chempionlikka da’vogarlarga esa yumshoqroq munosabatda bo‘lishayotgani haqidagi fikrlar tobora ko‘payib bormoqda. Ularning fikricha, turli klublar o‘yinlaridagi bir xil epizodlar turlicha talqin qilinadi.
