Madridning "Atletiko" klubi bosh murabbiyi Diyego Simeone Chempionlar ligasi umumiy bosqichining 1-turidan o‘rin olgan "Liverpul"ga qarshi o‘yindan nimalar kutayotgani haqida gapirdi.
Argentinalik mutaxassis ingliz klubida muxlislarning kuchli qo‘llab-quvvatlashi va jamoani top-darajaga olib chiqa olgan murabbiy borligini ta’kidladi. Uning so‘zlariga ko‘ra, "Liverpul" tezkor qarshi hujumlar, hujumda oddiyligi va to‘pni raqib jarima maydoniga bir zumda yetkazib bera olishi bilan ajralib turadi. Simeone bunday o‘yinga qarshilik ko‘rsatish oson bo‘lmasligini tan oldi. Shu bilan birga, "Atletiko" ustozi uning jamoasi o‘z ssenariysini o‘tkazishga harakat qilishini ta’kidladi.
- Kuchli raqib, ajoyib muxlislari va jamoani cho‘qqiga olib chiqqan murabbiyi bor. Ular juda kuchli, ammo biz o‘z o‘yinimizni o‘tkazishga harakat qilamiz," - deya Simeonening so‘zlarini keltiradi Marca.
