Milanning "Inter" klubi bosh murabbiyi Kristian Kivu "Sassuolo"ga (2:1) qarshi o‘yindan keyin jurnalistlarning savollariga javob qaytardi.

"Eng muhimi - biz o‘zimiz juda muhtoj bo‘lgan g‘alabani qo‘lga kiritdik, shu bilan birga yaxshi o‘yin namoyish etdik. Bizda barchasini avvalroq hal qilish imkoniyati bor edi, ammo "Sassuolo" darvozaboni ajoyib o‘yin ko‘rsatdi. O‘yin oxirida o‘tkazib yuborilgan gol keskinlikni keltirib chiqardi, ammo biz o‘z futbolimizni davom ettirishga harakat qildik. Xayriyatki, hammasi yaxshilik bilan tugadi. Biz tezroq to‘p uzatishimiz, hujumda yanada yaxshiroq harakat qilishimiz mumkin, ammo o‘yinchilarning xarakteri, qat’iyati, to‘g‘ri kayfiyatini ta’kidlash muhim," - dedi Kivu.